Ze isal suzidût a me mari?
le me gjenerose madrasse...
svuarbade cun tun colp di sclope, di freze, o ise stade le piere?
le piere che il cjazador al tirave per cjapà il nemâl,
bestie di mangjà, di domeà... potenze... podè.
Ze isal suzidût a me mari?
E curave forment e blave,
e sapave le pazienze e il nezesari,
scrodeade fin in somp da vuarzine e da filusufie.
Mudade in marcanzie par marcjadanz;
véle là, Penelope disfate intal fîl da spiete;
véle là, "sante Marie" e "putane Eve",
strisinade da scuris figuris di une storie grevie.
E dulà îse me mari?
No le cognòs,
me mari le madone, me mari le strie,
putane, vergjne,
no le cognos, no jè.
Me mari invenzion,
fantasma svuessât
pa antighe paure
di omps senze vite,
il stupro al è cun lûr,
il domeà il lûr savè invidrignît.
Ah! Me mari,
strie vergjne putane
inquietudine infinide,
infinitamentri cjastiade,
madrasse intrigôse
di lisp e caotic
scûr.

MMie sors
e stavin a cjalà malsiguris e cunfundudis
sul rapâr sbirlufît da storie;
culachidune 'e âre vignude in cà
ancje di lontan, 'e stàvìn, une par colôr,
un pucjs a balà sui brears al neon,
cualchi âtre 'e tornave strache muarte,
li plui zovinis, no savevin ben
e 'e cjantavin canzonetis.
Ze isal suzidût a mie sors?
Cualchidune 'e vegneve partade vie
forsi no tornave plui,
se 'e tornave no are plui come prime.
Tantis, làvie, e arin stadis "feminis di confuart",
âtris, in tal timp plui dongje,
pasadis fûr par fûr dal stupro etnic,
cualchidune, si cjatave su le cronache nere
intal mis mas di ogni dì
cualchi âtre sbregade sui gjornai dal estât;
mie sors, li grandis e li pizulis, ogni tant,
il cjâf sfruzulât, il cuarp un scartos.
Une volte, e ancje cumò, o làvin vie insieme,
e "le gnot nùs plâs, o volin là fûr in pâs",
le gnot sigûr, il dì, il timp dret e ledrôs,
a torzeon par dùt, spirz che il vecjo cjazador nol cognòs
Atris, difarentis, cun mie sors,
planc planc 'o discusivin i ûrs,
senze imberdeâsi ta lèz
che 'e veve zà incjastradis tantis,
o làvin a zirì
sòt il ziment ordinadôr
le mari antighe,
forsi di prime
dal antîc stupro,
...gjavâlu da storie a vignî...
Cun mie sors 'o fasarìn un'âtre storie.